སོ་སྐྱེའི་བརྒྱུད་པས་བསླད་པ་མེད།
༄༅། །སོ་སྐྱེའི་བརྒྱུད་པས་བསླད་པ་མེད། དཔལ་གདོད་མའི་མགོན་པོ་མི་གཟུགས་ཅན། །ཕ་བློ་གྲོས་མཐའ་ཡས་ཞབས་ལ་འདུད། །བུ་སྙིང་དང་འདྲ་བའི་ཕྲིན་ལས་པ། །ཁྱེད་སྔོན་ཡང་བསོད་ནམས་བསགས་པའི་མཐུས། །རྟེན་དལ་འབྱོར་ཚང་བའི་མི་ལུས་རྙེད། །རྗེ་མཚན་ལྡན་བླ་མས་རྗེས་སུ་བཟུང་། །ཆོས་ཟབ་རྒྱས་གདམས་པའི་བདུད་རྩི་ཐོབ། །ཚེ་འདི་ལ་མ་ཆགས་ལྷ་ཆོས་མཛད། །གཏན་འདུན་མ་ལེགས་པའི་ཕོ་རྒོད་ལགས། །ང་མདོ་ཁམས་སྨད་ཀྱི་བཙུན་པ་དང་། །དཔལ་འཕྲུལ་སྣང་གཙུག་ལག་ཁང་དུ་འཕྲད། །དུས་རྒྱུན་རིང་བར་དུ་གྲོགས་སུ་འགྲོགས། །གནས་འོག་མིན་མཆིམས་ཕུའི་ནགས་ཁྲོད་དུ། །ཆོས་རྩོལ་མེད་ཐེག་པ་ཀུན་གྱི་རྩེ། །དཔལ་ཨ་ཏི་ཡོ་གའི་མན་ངག་བཅུད། །ཁོང་ལྕེ་བཙུན་བི་མའི་ཟབ་ཏིག་གི། །སྨིན་གྲོལ་གྱི་གདམས་པ་ཚང་སྤྲུག་ཕུལ། །འདི་སྔོན་སྨོན་ལེགས་པའི་བརྡ་རུ་གོ། མི་ང་རང་ཞན་ཏེ་བརྒྱུད་པ་བཟང་། །དཔལ་ཀུན་ཏུ་བཟང་པོ་ནས་བཟུང་ནས། །མགོན་པདྨ་གར་དབང་ཡན་ཆོད་དུ། །འཕགས་པའི་གང་ཟག་མ་གཏོགས་པ། །སོ་སྐྱེའི་བརྒྱུད་པས་བསླད་པ་མེད། །བུའི་གསོལ་བ་ཐོབ་དང་བྱིན་རླབས་འབྱུང་། །ངེས་འབྱུང་གི་ཕ་མཁར་བརྟན་མཛོད་དང་། །ཚུལ་ཁྲིམས་ཀྱི་ཕུང་པོ་ཅིས་ཀྱང་དག །གཞན་ཕན་གྱི་བསམ་སྦྱོར་མ་ཉམས་ན། །རྒྱལ་སྲས་ཀྱི་གྲལ་དུ་ཅིས་ཀྱང་ཚུད། །དག་སྣང་གི་བློ་ཁ་མ་ལོག་ན། །རིམ་གཉིས་ཀྱི་འབྲས་བུ་ཅིས་ཀྱང་འབྱུང་། །ཆོས་བརྒྱད་ཀྱི་དགྲ་བོ་ཆོམ་མཛོད་དང་། །བྱ་བཏང་གི་རྩེ་གཅིག་ཡོང་བར་ངེས། །སྒྲུབ་མཐའ་དེ་འཆི་ལ་གཏོད་མཛོད་དང་། །གྲུབ་གཉིས་ཀྱི་འདོད་པ་འཇོ་བར་ངེས། །རྩོལ་མེད་ཀྱི་མོས་གུས་སྐྱེད་མཛོད་དང་། །དོན་བརྒྱུད་ཀྱི་བྱིན་རླབས་འཕོ་བར་ངེས། །མཐར་འཛིན་གྱི་ལྟ་བ་དོར་མཛོད་དང་། །དབུ་མ་ཡི་བདེན་དོན་མཐོང་སྟེ་མཆི། །ཅིར་སྣང་ཀུན་ཆོས་སྐུར་སྦྱོང་མཛོད་དང་། །ཕྱག་ཆེན་གྱི་དགོངས་པ་རྟོགས་ཏེ་མཆི། །ཡེ་གྲོལ་གྱི་རིག་པ་རྗེན་ཕུད་དང་། །རྫོགས་ཆེན་གྱི་ཡེ་ཤེས་རྟོགས་ཏེ་མཆི། །གཏད་མེད་ཀྱི་ཤེས་པ་རྒྱ་ཡན་འདི། །འཇུར་བུ་ཡི་དྲན་པས་མ་བཅུན་ཡང་། །མཐའ་གྲོལ་གྱི་རིག་པ་ཕྱམ་བརྡལ་ཉིད། །རེ་དོགས་ཀྱི་སྲད་བུས་མ་བཅིངས་ཨང་། །རྩལ་ཐུགས་རྗེའི་འཆར་ཚུལ་མ་འགགས་པ། །དགག་སྒྲུབ་ཀྱི་བློ་ཡིས་མ་བཅོས་པར། །རང་གྲོལ་གྱི་གནད་ལ་གོམས་མཛོད་དང་། །འོད་གསལ་གྱི་ཉི་མ་ཁོང་ནས་འཆར། །བློ་བདེ་དེ་རྒྱུན་ཆད་མེད་པར་མཆི། །ཚུལ་འདི་སྐད་སྔགས་བཙུན་སྙོམ་ལས་མཁན། །བློ་བག་ཡང་པདྨ་རྣམ་རྒྱལ་གྱིས། །དཔལ་འོག་མིན་མཆིམས་ཕུའི་ནགས་འདབས་སུ། །བློར་གང་ཤར་བཀག་མེད་གླུ་རུ་བླང་། །གྲོགས་དད་པ་ཅན་གྱི་གཟིགས་མོར་མཛོད། །དགེ་དེས་ཀྱང་འགྲོ་ཀུན་ཡོངས་གྲོལ་ཤོག །